भक्तपुर-नेपाली कांग्रेसका केन्द्रीय सूचना, सञ्चार तथा प्रचार विभागप्रमुख मीन विश्वकर्माले गठबन्धन सरकारको एक वर्षको कार्यकाल विगतको तुलनामा सफल रहेको बताउनुभएको छ । बुधबार रफत सञ्चार क्लब भक्तपुरमा आयोजित सञ्चार संवादमा उहाँले संविधान कार्यान्वयन, सुशासन प्रवद्र्धन, परराष्ट्र सम्बन्ध विस्तार गर्न वर्तमान सरकार विगतको दुई तिहाइ नजिकको नेकपाको सरकारभन्दा सफल भएको बताउनुभयो ।
नागरिकता विधेयक कार्यान्वयनमा आउनु, विभिन्न ऐन, संसद्मा पेस भएर पारित हुने चरणमा पुग्नु वर्तमान सरकारको उपलब्धि भएको श्री विश्वकर्माले बताउनुभयो ।कांग्रेस नेता विश्वकर्माले भन्नुभयो, “भ्रष्टाचारका सबै फाइल खोल्छु भनेर गृहमन्त्रीले भन्नुभएको छ तर जनताले दबाब दिएका फाइल खुलेका छैनन्, अर्थतन्त्रमा अपेक्षितरुपमा सुधार हुन सकेको छैन, अब कडाइका साथ त्यता लाग्नुपर्छ ।”
विभिन्न आपराधिक गतिविधिमा संलग्न भएको आरोप लागेका व्यक्तिलाई लुम्बिनी प्रदेशको उद्योगमन्त्री बनाउनु पार्टीको दोष नभएको भन्दै उहाँले निर्वाचित जनप्रतिनिधि मन्त्री बन्नु सामान्य विषय भएको प्रतिक्रिया दिनुभयो ।
