मान्म (कालीकोट), १४ मङ्सिर : कालीकोटका नौवटै स्थानीय तह निमित्तका भरमा सञ्चालन भइरहेका छन् । तीन नगरपालिका र छ वटा गाउँपालिकाले अहिले प्रमुख प्रशासकीय अधिकृत पाएका छैनन । स्थानीय तह सञ्चालन ऐनमा नगरपालिकामा उपसचिव र गाउँपालिकामा अधिकृतस्तरको कर्मचारी प्रमुख प्रशासकीय अधिकृत हुने व्यवस्था भए पनि सो अनुसार यहाँका स्थानीय तहमा हुन सकेको छैन ।
स्थानीय तह सञ्चालन आएदेखि तिलागुफा नगरपालिकाले एकपटक प्रमुख प्रशासकीय अधिकृत दरबन्दीअनुसार उपसचिव उद्धव रिजाल आउनुभए पनि छोटो समयमै सरुवा हुनुभयो । अहिले त्यहाँ अधिकृतस्तरको कर्मचारी लालबहादुर मल्ल प्रमुख प्रशासकीय अधिकृतका रुपमा काम गरिरहनुभएको छ । खाडाचक्र नगरपालिकामा जिल्ला विकास समितिका छैटौँ तहका कर्मचारी प्रवलजङ शाहीलाई जिम्मेवारी निर्वाह गरिरहनुभएको छ ।
रास्कोट नगरपालिकाले पशु सेवातर्फका सातौँ तहका प्राविधिक जवानसिंह बमलाई विगत पाँच वर्षदेखि कार्यालय प्रमुखको जिम्मेवारी भएर काम गरिरहनुभएको छ भने सान्नीत्रिवेणी गाउँपालिकामा पनि पशु सेवातर्फका पाँचौँ तहका प्राविधिक नेत्रबहादुर शाही कार्यालय प्रमुख भएर काम गरिरहनुभएको छ ।
पलाँता, नरहरिनाथ, महाँवै र शुभकालिका गाउँपालिकामा पनि पाँचौँ तहका कर्मचारीले कार्यालय प्रमुख भएर कामकाज गदै आउनु भएको छ । कर्मचारी पनि खासै दुर्गममा बस्न नचाहने समस्याका कारण कार्यालयहरु प्रमुखविहीन बनेको रास्कोट नगरपालिकाका प्रमुख धर्मराज शाहीले बताउनुभयो ।
“मन्त्रालयमा दरबन्दी अनुसारका कार्यालय प्रमुखका लागि पटक-पटक ताकेता गरेपनि कोही आउन मान्नुहुन्न”, उहाँले भन्नुभयो, “यहाँ काम गर्नका निमित्त नतोकी स्थानीय तहको काम गर्न सकिन्न ।” स्थानीय तहमा दरबन्दी अनुसारको कर्मचारी नहुँदा काम गर्न समस्या भएको त्यसका लागि मन्त्रालयसँग माग गर्दा पनि अहिलेसम्म पदपूर्ति हुन नसकेको नरहरिनाथ गाउँपालिकाका अध्यक्ष नगेन्द्र विष्टको भनाइ छ । “हामी दरबन्दी अनुसारको कर्मचारी चाहियो भनेर प्रदेश र सङ्घमा धाइरहेका छाँंै”, उहाँले भन्नुभयो, “तर सोअनुसारको कर्मचारीको पदपूर्ति नै भएको छैन ।”
—
