गलकोट-नेकपा (माओवादी केन्द्र)का सचिव तथा पूर्वशिक्षामन्त्री देवेन्द्र पौडेलले अहिलेको गठबन्धन सरकार निरन्तर चल्ने दाबी गर्नुभएको छ । उहाँले सरकार ढल्ने कुनै सम्भावना नरहेको जिकिर गर्नुभयो ।
प्रेस सेन्टर नेपाल बागलुङले आयोजना गरेको पत्रकार सम्मेलनमा अहिलेको गठबन्धन लामो समयसम्म रहिरहने र सरकारले भ्रष्टाचारविरुद्धको कामलाई निरन्तर अगाडि बढाइरहेको बताउनुभयो ।
बागलुङ क्षेत्र नं २ का सांसदसमेत रहनुभएका नेता पौडेलले भ्रष्टाचारविरुद्ध अहिलेको सरकारले लिएको अडानका कारण सरकार सञ्चालनमा कुनै समस्या नआएको भन्दै अहिलेको सरकार गिराउन विभिन्न चलखेल भए पनि त्यो सम्भव नहुने स्पष्ट पार्नुभयो । उहाँले भन्नुभयो, “सरकारले दृणतापूर्वक भ्रष्टाचारविरुद्ध काम गर्दै आएको छ ।”
बागलुङको इमेज सहकारीले जनताको डेढ अर्ब रकम उठाएर ढोरपाटन नगरपालिकाका नगरप्रमुख फरार भएको विषयलाई आफूले गृह मन्त्रालयमा ध्यानाकर्षण गराएको बताउनुभयो । नेता पौडेलले भन्नुभयो, “बागलुङको सहकारी समस्याको विषयमा गृह मन्त्रालयलाई ध्यानाकर्षण गराएको छु, फरार रहेका सहकारीका अध्यक्षलाई पक्राउ गर्न आवश्यक छ ।” बागलुङस्थित इमेज सहकारीले जनताको डेढ अर्ब रकम उठाएर सञ्चालक फरार भएपछि जनताको गुनासो सुन्न नेता पौडेल गृहजिल्ला आउनुभएको छ ।
